पुणे : भारतीय जनता पक्षाचा वर्धापनदिन नुकताच साजरा करण्यात आला. या निमित्ताने भाजपचे नगरसेवक आणि कार्यकर्त्यांनी शहरभर विविध उपक्रमांचे आयोजन केले होते. प्रभाग क्रमांक १९मध्येदेखील वर्धापन दिनानिमित्त स्वच्छता मोहीम व सफाई कामगारांचा सत्कार करण्यात आला.
‘स्वच्छ भारत’ अभियानांतर्गत देशाच्या स्वच्छतेचा वसा सर्वांनी घेतला आहे. त्यात भाजपचे उत्साही कार्यकर्ते, पदाधिकारी कसे मागे राहणार? नगरसेविका मनीषा लडकत आणि अर्चना पाटील यांनी सफाई कर्मचाऱ्यांसोबत कासेवाडी झोपडपट्टी व लोहियानगर भागात साफसफाई केली. नियमित सफाई करून शहर स्वच्छ ठेवणाऱ्या पालिकेच्या सफाई कर्मचाऱ्यांचे कौतुक व सत्कार या वेळी करण्यात आला. रफिक हबीब शेख, शंतनू बापू कांबळे, वाघमारे व पक्षाचे इतर पदाधिकारी आणि कार्यकर्ते या वेळी उपस्थित होते.
